பெருந்தேவி

எதிர்க்கவிதையின் அல்வாப்பதம்

பெருந்தேவி

தலைப்பு செய்தி.

***

ஒரு கோப்பை விஷத்தை வாயிலூற்றி அதை இன்னொரு கோப்பையில் துப்பவேண்டும். இதைச் செய்யும்போது வாயில் நீர் ஊறக் கூடாது விழுங்கக்கூடாது தெறிக்கக்கூடாது. வாய் இடையில் பங்குபெறுகிற சிறு பாத்திரம்தான். இந்தக் கலைச் சூத்திரங்கள் மொழியில் கூடிவர வேண்டும்.

***

மொழியிடம் ஆடுறா ராமா என்று கூவுவது பாவம் உண்மையில் மொழி ரங்கராட்டினம். மேலே ஏறும் போது அச்சமில்லாமல் கீழே இறங்கும்போது ஊக்கம் குறையாமல் இருப்போம். குரங்காட்ட ரசிகர்களிடமிருந்து மொழியைக் காக்கும் கடமை நமக்குண்டு.

***

கவிதையின் பிம்பமல்ல எதிர்க்கவிதை. சூனியக்காரியின் கையிலிருக்கும் கண்ணாடியிலிருந்தும் உள்ளபடி உரைக்காதிருப்பதில் வேறுபடுகிறது எதிர்க்கவிதை. இடம் அதில் ரேகை. காலங்கள் தங்கள் எச்சம்.

***

எதிர்க்கவிதை ஒரு நல்ல நாளில் நாள்பட்ட ஒயின் போலச் சுவைக்கும். மோசமான நாளில் முதல் வரியில் தூங்கவைக்கும்.

***

தமிழுக்குப் பல என்று பேர்.

 

சலனம்

பெருந்தேவி

படுக்கைவிரிப்பைத் தட்டிப்போட்டேன்
ஜன்னல் பக்கம் சின்ன அசைவு
உற்றுப் பார்த்தேன்
நிழலைப் போலெழும்பி கண்முன்
நின்றது மண்டையோடு
(எல்லா மண்டையோடுகளைப் போல)
இதற்கும் சிரித்த களையான முகம்
என்றாலும் எனக்கேயானது அந்தச் சிரிப்பு
என்று கண்டுகொண்டபோது மகிழ்ச்சி
நிலைகொள்ளவில்லை
சுப்ரமணியபுர நாயகனின்
ஸ்டைல் (அதுவேயான) தலையசைப்பில்
அதைச் சுற்றி அடர்ந்த
இருள் ஒரு டோப்பா கலை
‘உடலும் இல்லாத உருவம் கொள்ளாத
கடவுளைப் போல் வந்து கலந்திட்டாய்’
கள்ளக்குரல்களில்
(வாசல் நேர்வழி அது வராததால்)
கலந்து பாடினோம்
கனவில் கையற்ற அது
(இருந்தாலும்)
இரு கைகளையும் அகல விரித்து
ஆகாவென சைக்கிள் ஓட்டுகிறது
நானும் ஒவ்வொரு தெருமுக்குக்கும்
45˚ பறவைப் பார்வை
கிளுகிளுப்பில் நடக்கிறேன்
கடைசியில் துரோகம்
என்னையும் உந்தும்போது
எப்படி சாகடிப்பது மண்டையோட்டை

 

நான் ஜிம்மி ஜிக்கி

பெருந்தேவி

கோரைப்புல் வெட்டப்படாத
குழப்பமான மைதானத்தை
மூன்று முறை சுற்றிவிட்டு
மூச்சிரைக்க வீட்டுக்கு வந்தால்
ஜிக்கி சமையலறைக்குள்
வாய் எந்திரம் அரைபடுகிறது
வரவேற்பறை சோஃபா மூலையில்
ஜிம்மி புரண்டுகொண்டு
சோம்பேறிக் கழிசடைகள்
ஜிக்கியருகே ஹலோ சொல்லப்போனால்
எனக்கு சாடை போ போ-வென்று
ஜிம்மிக்கும் நன்றி உணர்ச்சி
கொஞ்சமுமில்லை
எத்தனை முறை நடத்திச் சென்றிருக்கிறேன்
இப்போதோ பார்த்தும் பார்க்காதமாதிரி
போகட்டும்
பார்த்து நாளான என் காதலியை
இன்றைக்காவது பார்க்கவேண்டும்
பக்கத்துத் தெரு அவள்
இப்போதைக்குப் பசிக்குப் போதும்
இறைச்சி ஒரு துண்டு
நானென்ன ஜிக்கியா
ஜிக்கிக்கு தின்பது மட்டும்தான் வேலை
போட்டால் தின்னும் ஜிம்மிக்கு ஒரு தட்டு
ஜிம்மி கிழிப்பதற்கு
அதுவே அதிகம்
ஜிக்கி சிடுமூஞ்சி அசிங்கமான பற்கள்
நான் என்றால் ஆகாது
ஜிக்கி எனக்காகக் காத்திருப்பதுகூட இல்லை
கொஞ்சம் வெளிக்காற்று வாங்கிவிட்டு வந்தால்
பூட்டிய கதவில்தான் முழிக்கவேண்டும்
என்னைக் கொஞ்சுகிறேன் என்று
செல்ல அடிகள் தருவதுண்டு
தழும்புகள் ஏற்படும் அளவுக்கு
ஒரு காட்டு காட்டுவேன் நானும்
இப்போது அவசரக்குரலில் அழைப்புகள் எனக்கு
ஜிக்கியின் கட்டைக்குரலில் ஆண்
கடுகடுப்பு சுருதியை ஏற்றுகிறது
“சனியனக் கட்டிவச்சாலும்
அத்துக்கிட்டுப் போகுது”
நான் ஆட்டுகிற வாலைக் கூட
கவனிக்கவில்லை ஜிம்மி
கைப்பேசியைக்
கொஞ்சிக்கொண்டே
வீட்டுக்குள் நுழைகிறாள்
அவள் ஸ்டைல்

 

நீங்கள் கைதூக்க அல்ல இக்கேள்வி

பெருந்தேவி

பொதுக் கழிவறைச் சுவர்களில்
கலை ஆர்வத்தோடு
கணவனைப்
படம்போட்டு பாகம் குறிக்க
எந்தக் கண்மணிதான்
நினைப்பதில்லை?