அதற்குப் பின்னால்
எந்தக் கதையுமில்லை
வினாடியைப்போல இரட்டித்து
மூடித்திறக்கிறது
தன்னுடலையே கீலாக்கி
அதற்கு
எதிர்காலமில்லை
இறந்த காலத்துடன்
இணைப்பு ஏதுமில்லை
இஃதொரு
நிகழ்காலச் சிலேடை
கொடிய மலைகளை
தன் சிறகுகளுக்குள்
கொண்டுள்ள
சிறிய
மஞ்சள் நிற
வண்ணத்துப் பூச்சி
ஒரு துளியளவு
மஞ்சள்
திறக்கும் முன் மூடி
மூடும் முன் திறக்…
எங்கே அது?
ஓவியம் – நந்து
௦௦௦
அருண் கொலாட்கரின் The Butterfly என்ற கவிதை தமிழாக்கம்
இந்த ஐந்து மலைகள்தான்
கந்தோபா கொன்ற
ஐந்து பூதங்கள்
என்கிறான் பூசாரியின் மகன்
பள்ளிவிடுமுறை நாட்களில்
வழிகாட்டியாக வரும்
சிறுவன்
அந்த கதையை
நீ உண்மையிலேயே
நம்புகிறாயா என்றால்
அவன்
பதில் சொல்வதில்லை
தோள்களை குலுக்கியபடி
சங்கடத்துடன்
வெறுமனே பார்க்கிறான்
வேறெங்கோ
ஒழுங்கற்று வளர்ந்து
வெயிலில் வறண்ட
கற்றைப்புல்லின் மேல்
அசைவின்
ஒரு கண்சிமிட்டலை
காண முடிகிறது
அவனால்
அங்கே பாருங்கள்
பட்டாம்பூச்சி
என்கிறான்.
00
அருண் கொலாட்கரின் The Priest’s Son என்ற கவிதை தமிழாக்கம்
..
ஒளிப்பட உதவி – i Share
மலைகள், பூதங்கள் –
மாக்கல் பட்டையில்
மணலடித்த தோள்கள்
பூதங்கள், மலைகள் –
பாறையின் விலாக்களில்
கிழித்தெழும்பும் கற்றாழை
மலைகள், பூதங்கள் –
கண்ணாடிக்கல் மூட்டு
சுண்ணாம்புக்கல் கவடு
மலைகள், பூதங்கள் –
வானத்தின் சதை கிழிக்கும்
கற்றாழையின்
கோரைப்பற்கள்
மலைகள், பூதங்கள் –
படியாலான
முதுகெலும்பு
மலைகள், பூதங்கள் –
வெயில் வருடிய
மணற்பாறையின்
தொடைகள்
மலைகள், பூதங்கள் –
கருங்கல் இடுப்பாய்
தளர்ந்த விதானம்
பூதங்கள்.
ஜெஜூரியின் கற்கள்
திராட்சையைப்போல இனியவை
என்ற சைதன்யா
ஒரு கல்லை
தன் வாயிலிட்டு
கடவுள்களாக
உமிழ்ந்தான்
கதவு திறந்திருக்க
மனோகர் நினைத்தான்
இன்னொரு கோயிலென
உள்ளே பார்த்தான்
எந்தச்சாமி இருக்குமோ
என்ற எதிர்பார்ப்பில்
அகன்ற கண்கள்
கொண்ட கன்று ஒன்று
திரும்பிப் பார்க்கவும்
இஃதொன்றும்
கோயில் அல்ல
மாட்டுத்தொழுவம் மட்டுமே
என்றான் மனோகர்
௦௦௦
அருண் கொலாட்கரின் Manohar என்ற கவிதை தமிழாக்கம்
பதாகை 