– எஸ். சுரேஷ் –

தாய் வாத்தின் பின்னால் ஒழுங்கான வரிசையில்
புட்டத்தை அசைத்து அசைத்து நடந்துகொண்டிருந்த
குட்டி வாத்துக்கள், டீச்சர் பின்னால் கலைந்த வரிசையாய்ச்
சென்று கொண்டிருந்த மாணவர் கூட்டத்தைக் கடக்கும்பொழுது
குட்டி வாத்து ஒன்று, ஒரு மாணவனைப் பார்த்து கேட்டது-
“எல்லோரும் எங்கே போகிறீர்கள்?”
மாணவன் மகிழ்ச்சியில் மேலும் கீழும் குதித்து,
“நாங்க பிக்னிக் வந்திருக்கோம். ஏரிக்குப் போய்
வாத்து பார்க்க போறோம்”,
என்று உற்சாகத்துடன் கூவினான்.
பிறகு தன்னைக் கடந்து சென்றுகொண்டிருக்கும்
வாத்துக் கூட்டத்தை குழப்பத்துடன் நோக்கினான்.