புதிதாக குடியேறிய வீட்டில்
எங்கள் கண்கள்
ஒன்றோடு ஒன்று உறைந்த
முதல் நொடி

தத்தியாக நான் நின்றுகொண்டிருக்க
தீர்க்கமான ஒரு முறைப்பு
வாழ்நாள் முழுமைக்குமான பகை

***********************************************

மாடிப்படியின் கைப்பிடிச் சுவற்றில்
மேலே பார்த்துக் கொண்டு
பிசிரற்ற கவனத்தோடு
எதற்கோ தயாராகிக் கொண்டிருக்கிறது

ஐந்தடிக்கு அப்பால்
தான் சாத்தியப்படுத்தும் உண்மை
தெரியுமா  அந்தப் பூனைக்கு

**********************************************

என்ன சத்தம்
பூனையா பறவையா
பூனையின் பிரசவமா
அல்லது அதன் பயமா
கூடுவதற்கான சமிக்ஞையா
இந்த நள்ளிரவிலா

என்ன லட்சியம் ஒழிந்து
போய்விட்டதென்று இந்தக் கதறல்

விளக்கிட்டுத் தேடினால்
பூனையும் இல்லை
கதறலும் இல்ல

                                                                  –  அதிகாரநந்தி