ஒரு சோதனை முயற்சியாக, மூல மொழியைக் கருதாமல்,  திரு ஏ கே ராமானுஜன் அவர்களின் Speaking of Shiva என்ற தொகுப்பில் உள்ள  ஆங்கில மொழிபெயர்ப்புகள் தமிழாக்கம் செய்யப்படுகின்றன – கலவை விளைவுகளுடன்!

அடியார்க்கு

ஒருவேளை நீ

மூங்கிலை இரண்டாய்

பிளந்தால்;

அடிப்பகுதியை பெண்ணாகவும்,

தலைப்பகுதியை ஆணாகவும் கொள்;

அவை பற்றிக்கொள்ளும் வரை

ஒட்டித் தேய்;

                       இப்போது சொல்,

அதில் பிறந்த நெருப்பு,

ஆணா,

அல்லது பெண்ணா,

ராமநாதா?

 .

(தேவர தாசிமய்யா)

 .

– : ஸ்ரீதர் நாராயணன்

 .

௦௦௦

 .

மரத்தின் மேல் குரங்கைப் போல்

கிளைக்குக் கிளை தாவும்

இந்தத் தகிக்கும் மனதை

நான் எப்படி நம்புவேன்?

என் அப்பனிடம் போக

விட மறுக்கிறதே

கூடலசங்கமதேவா

 .

(பசவண்ணர்)

 .

எஸ். சுரேஷ்

 .

௦௦௦

 .

மாயை என் மாமியார்;
உலகம் என் மாமனார்;
புலிக்குட்டி போல் மூன்று மைத்துனர்கள்;
என் புருஷனின் மனமெல்லாம்
பெண்களின் சிரிப்பு.
தூ, இவனல்ல இறைவன்.

ஆனால் குறுக்கே நிற்கிறாள் என் நாத்தி.

இந்தச் சிறுக்கிக்குத் தெரியாமல் நழுவி
என் கணவனை ஏய்த்து
அரனைக் கள்ளக் காதலனாய்க் கொள்வேன்

மனமே என் சேடிப் பெண்:
அவள் அருளால் அடைவேன்
இறைவனை,
அழகுக்கு அழகான என் இறைவன்
முகடுகளுக்கு உரியவன்
மல்லிகை போல் வெண்ணிறன்
அவனை வரித்தேன்
நாயகனாய்

–

(அக்கா மகாதேவி)

 .

அபிநந்தன்