– காஸ்மிக் தூசி –
கிழவியொருத்தி
உங்கள் சட்டையை பிடித்துக்கொண்டு
கூடவே வருகிறாள்.
ஐம்பது பைசா கொடுத்தால்
குதிரைலாட கோயிலுக்கு
கூட்டிப்போவேன் என்கிறாள்.
நீங்கள் ஏற்கனவே பார்த்ததுதான்
என்றாலும்
இடறிக்கொண்டு
பிடியை இறுக்கி
கூடவே வருகிறாள்.
கிழவிகள் எவ்வளவு பிடிவாதக்காரிகள்
என்பது தெரியுமல்லவா
நாயுருவி முள்ளாகி
விடாமல்
பற்றிக்கொள்வர்.
கேலிக்கூத்தை நிறுத்த
அவளை எதிர்கொள்ளுகையில்
என்னைப்போன்ற கிழவியொருத்தி
இந்தப்பாழும் மலைக்காட்டில்
வேறு என்னதான் செய்யமுடியும்?
என்கிறாள்.
நீங்கள் பார்வையை திருப்பினால்
வானத்தைப்போன்ற வெறுமை
துப்பாக்கியால் சுட்டது போன்ற
குழிகளில் கண்கள்.
அவள் முகத்தில் தோன்றி
நரம்புகளைத் தாண்டி
உடலெங்கும் ஓடும்
விரிசல்களை பார்க்கையில்
மலைகள் சரிகின்றன
கோயில்கள் சரிகின்றன
வானமே இறங்கி வருகிறது
தனித்து நிற்கும் கூனியின்
உடையாத உறுதியில்
கண்ணாடித்தட்டைப்போல
கலகலத்து
இறுதியில்
அவள் கையில் வைக்கப்படும்
ஒரு சிறு நாணயமாக
சுருங்கி விடுகிறீர்கள்.