• சிகந்தர்வாசி

அவள் முகத்தை உற்றுப்பார்க்கிறேன்
சுருக்கங்கள் ஒவ்வொன்றாக மறைந்து
கன்னங்கள் வழவழப்பாகின்றன
எங்கோ வெறித்து பார்க்கும் கண்களில்
இப்பொழுது தீ

தூரத்தில் மங்கிய ஒளியில் பச்சை மலச்சரிவுகள்
ஒளிரும் வெள்ளை மேகங்கள்
எங்கு பார்க்கினும் பரவசம்

மேகங்கள் கலைந்து கலைந்து கலைந்து கலைந்து
வேறு வேறு உருவங்களாக மாறுகின்றன
ஒளிரும் மேகங்கள் ஒளி மங்கி கறுத்து
மீண்டும் ஒளிர்ந்து மங்கி ஒளிர்ந்து
இப்பொழுது?

தெரிந்த பாதையிலா போனோம்? மலைகள்
மறைந்து வேறு மலைகள் தோன்ற
ஏன் சென்றோம் என்று சில பாதைகள்
வண்ணமயமான பல பாதைகள்
எங்கோ மறைந்து போன பாதைகள்

மெதுவாக எழுந்து தளர்ந்த நடை நடக்கிறாள்
உடன் நானும் மெதுவாய் எழுந்திருக்கிறேன்