என்னது?
சட்டையை
கழற்றிவிட்டு
பூஜை செய்ய
போகவா?
நன்றி வேண்டாம்.
என்னால் ஆகாது
நீங்கள் விரும்பினால்
தாராளமாக போகலாம்.
போகும் முன்
தீப்பெட்டியை தருகிறீரா?
புகைத்தால்
யாரும்
பொருட்படுத்தாத
முற்றத்தில்
வெளியே
இருக்கிறேன் நான்.
000
அருண் கொலாட்கரின் Makarand என்ற கவிதை மொழிபெயர்ப்பு
இந்த பிணத்துக்கு
என்னுடைய சொற்கள்
கேட்டிருக்கலாம்
அதனால்
மெல்ல அசைகிறது
இந்த பிணம் நடந்திராத
சாலை
மிருதுவும் ஆபத்துமில்லாதது
இந்த பிணத்தின்
நீலம் பாரித்த முத்தங்கள்
தீராதுயரோடு இன்றும்
தனித்தலைகின்றன
இதோடு
சேர்த்துக் கட்டிய
இரவல் பூமாலை
தன் காதலியின் இருளை
மணக்கச் செய்ய
வாங்கிச் செல்லும் பூத்துண்டைப்
போன்றது
பிணமாவதற்கான
முந்தைய பொழுதுகளில்
தீவிர வெயிலொளி படரும்
பந்தலற்ற
தெருவின் புழுதிக்கு
மணல் ஓவியம் வரைய
கற்றுக் கொடுத்ததாம்
இது
கூடுதலாக
பிணமாவதற்கு சற்று முன்பு
என்னொருவனோடு
அரை கிளாஸ்
மேன்சன் ஹவுஸ்
நீர் கலக்காமல்
பகிர்ந்தருந்திக் கொண்டிருந்தது கூட
அதிலும்
அழுகி
நாற்றம் பீடிக்கும் வரை
அது பிணமென்றே ஒப்புக்கொள்ளப்படவில்லை
000
ஒளிப்பட உதவி – Art Lies
மிகவும்
மேடுபள்ளமில்லாத
பலமாக
காற்றடிக்காத
ஓரு இடத்தை
கண்டுபிடிக்க
வேண்டும்
ஒரு கல்லின் மேல்
இன்னொரு கல்
அதற்குமேல்
மூன்றாவது கல்
என்றவாறு
அடுக்க வேண்டும்
அடுத்தகல்லை
நினைவில் வைத்து
ஒவ்வொரு கல்லையும்
எடுக்க வேண்டும்
சரியான அளவில்
சரியான எடையில்
முதல் கல்லை
சரியாக வைத்தால்
நிற்கும்
எல்லாக்கல்லும்
கடவுள்
ஆசிர்வதிக்கட்டும்
இளம்பெண்ணே
உன் சாதுர்யம் போலவே
அதிர்ஷ்டமும்
வாய்க்கும்
வீட்டுக்குப்போ
உன் கணவனுடன்
சந்தோஷம் உண்டாகி
இருக்கட்டும்
எப்போதும்.
000
அருண் கொலாட்கரின் A Little Pile of Stones என்ற கவிதை மொழிபெயர்ப்பு
எப்பொழுதும் போல
விடியவில்லை நேற்றைய
காலை
காகங்கள் கும்பலாக
கரைந்து
சூழ
வெட்டு ஓடுகளினின்று
ஊசிகளாய் இறங்கிய
மங்கலான வெளிச்சம்
துடைப்பமிடா அலைந்தோடும்
புள்ளித் துகள்களுள்
படரத் துடித்தன
அழைப்பு மணியின்
பித்தானுக்கு சுவர்க்கோழி
பதில் சொன்னது
இராசி பலன் சொல்லிகள்
தேவையற்றுப் போனார்கள்
நீண்டு வந்த இரயில்
வண்டியின் குரல் அடங்கிப்போயிருக்க
காலையில் அபூர்வமாய்
வரவுற்ற
பிச்சைக்காரன் மட்டும்
நிரந்தரமாக வீட்டுக்குள் தங்கிவிட்டான்
சிறுவர்கள் கூட்டமாக முற்றத்திலிட்ட கோலத்தின் மேல்
பீய்ச்சி அடித்த
பெருநீரின் நாற்றம்
அகாலத்தின் கனவொன்றில்
வந்து போனது
என் நம்பிக்கை சரிதான் அங்கு
அவள் கோலமிழந்த காட்சியில்
ஒரு நடிகையைப் போலவே
இல்லை வழக்கம் போல்
இவன் விரல்கள் சூப்பிக்கொண்டு
தவழ்ந்துகொண்டிருந்தான்
புனித சிலுவை அணிந்து
கண்ணாடிப் பெட்டிக்குள் வாழும்
என் கண்களில் இலை முனை வழி சொட்டும் நீரென விழ ஆரம்பித்த
நேரத்தில்
பிச்சைக்காரன் கையளித்து
என்னை
அழைத்துச் செல்கிறான்
மீள இயலா கனவொன்றிற்கு
௦௦௦
ஒளிப்பட உதவி – dreamstime
